حیزبی دێموكراتی كوردستانی ئێران بەرەو 15هەمین كونگرەی خۆی هەنگاو دەنێ و بۆ ئەم مەبەستەش لە بانگەوزازێكدا داوا لە هەموو نیشتمانپەروەرێك دەكا كە بۆ
باشتر ئامادەكردنی راپۆرتی كۆمیتەی ناوەندی و بەشەكانی دیكەی كاری ئامادەكاریی كۆنگرە یارمەتیدەر بن.
دەقی بانگەوازی حیزبی دێموكراتی كوردستانی ئێران:
بانگەواز
هاونیشتمانانی ئازادیخواز!
تێكۆشەرانی دەروەست!
حیزبی دێموكراتی كوردستانی ئێران بە دوای بەڕێوە بردنی 14 كۆنگرە ،ئێستا و لەم كاتە هەستیارەی ناوچەو ئێران و كوردستاندا لە سەردەمێكدا كە خەریكە لاپەرەكانی مێژوو هەڵدەدرێنەوەو داهاتووی گەلانی ناوچە دەنووسرێنەوە، لەم كاتەدا حیزبی دێموكراتی كوردستانی ئێرانیش، بەڕێوەیە تاكو كۆنگرەی پانزەی خۆی ببەستێت.
لە ڕەوتی خەبات و تێكۆشانی هەموو حیزبێكدا و بە تایبەت ئەو حیزبانەی كە پێگەێكی تایبەتیان هەیە لە ناو خەڵكدا ، كۆنگرەی حیزب جێگەو پێگەیەكی سیاسی و مێژووی تایبەتی خۆی هەیە . حیزبی دێموكراتی كوردستانی ئیران كە لە سەر دەستی تێكۆشەرانی كۆمەڵەی ژ-ك و لە سەرەوەی هەموویانەوە یەكەم سەرۆك كۆماری كوردستان، پێشەوا قازی موحەممەد دامەزراوە و دوایەش بە بیری داهێنەرانە و تیژی دوكتور قاسملووی نەمر و پاشان دوكتۆر سەعیدی شۆڕشگێر درێژەی بە خەباتی سیاسیی خۆی داوە، هەر دەم بە پێویستی زانیوه، دەرگای بو بیر و بۆچوونەكانی ئێوه ئاواڵه بێت، بە پێویست دەزانێ كە لە گەڵتان باس بكات كە بۆ هەرچی زیاتر وردتربوونەوە لە دۆخی ئێستای جیهان و ناوچەو وڵات و بۆ دەست نیشان كردنی سیاسەتی دروستی داهاتوو، داوا لە هەموو نیشتمان پەروەرانی دەروەست، مرۆڤە ئازادیخوازو شۆڕشگێڕەكانی كوردستان و ئێران بكا كە لە ئامادە كردنی هەرچی باشتری ئەو كۆنگرەیە لە باری فیكریەوە یارمەتیدەر و هاوڕێمان بن و بۆچوونەكانتان له ڕێگای نووسراو بۆمان بنێرن تاكوو له داڕشتنی ڕاپۆرتی كۆمیتەی ناوەندی بو كۆنگرەی ١٥ و باقی كارو بەرنامەكانی كۆنگرە كەڵكی پێویستیان لێ وەربگیردرێت. بانگەوازی ئێمە، بانگەوازێكە بۆ ئاوردانەوەیێكی زانستییانە و سەردەمیانەی دۆخی سیاسی ئێستا و داهاتوو كە بوارە جیاوازەكان لە خۆ بگرێ.
ئەو بابەت و لێكۆڵینەوەو شیكارییە سیاسییە جیددیانەی كە بە دەستمان دەگا لە لاپەرەی تایبەت لە ماڵپەری ناوەندیی حیزبی دێموكراتی كوردستانی ئێراندا بڵاودەكرێنەوە.
بۆ پەیوەندی كردن و ناردنی بابەتەكانتان، دەتوانن لەم ئادرەس ئیمەیلە كەڵك وەربگرن:
ئەم پۆستە ئەلیکترۆنیە لەلایەن ئامێرئ سپامەوەیە. جاڤاسکریپت دەبێت چلاک بکەی بۆ بینینی, you need JavaScript enabled to view it
تكایە نووسراوەكانتان لە 6 لاپەرەی A4 ی تایپ كراو تێ نەپەرێ.
هەر لە ئێستاوە دەستی هاوكاریی و نیشتمانپەروەریی هەموو ئێوە ئازادیخوازانی دەروەست بە چارەنووسی نیشتمان و نەتەوەكەمان دەگوشین.
كومیتەی ئامادەكاری كۆنگرەی پانزدەی
حیزبی دێموكراتی كوردستانی ئێران
