ک/مـــــیدیا: ئێران بۆ ساڵی‌ دووهه‌م وه‌ک گه‌وره‌ترین زیندانی رۆژنامه‌وانان له‌ جیهاندا له‌قه‌ڵه‌م درا، و زیندانی کردنی رۆژنامه‌وانان له‌ جیهان له‌ به‌رزترین ئاستی خۆی دایه‌.

به‌ پێی راپۆرتی هه‌واڵده‌رییه‌کان و له‌ زاری کۆمیته‌ی پاڵپشتی له‌ رۆژنامه‌وانان، ئه‌و کۆمیته‌یه‌ ئێرانی وه‌ک گه‌وره‌ترین زیندانی رۆژنامه‌ڤانان له‌ جیهان وه‌سف کردووه‌.

له‌م راپۆرته‌دا هاتووه‌، ژماره‌ی رۆژنامه‌ڤانانی زیندانی له‌ 15 ساڵی رابردوو له‌ جیهاندا گه‌یشتووه‌ته‌ به‌رزترین ئاستی خۆی.

به‌پێی ئه‌م راپۆرته‌، ئێستا له‌ وڵاته‌ جۆراوجۆره‌کانی جیهاندا 179 رۆژنامه‌وان له‌ زیندانه‌کان دان که‌ له‌ هه‌مبه‌ر ساڵی رابردوودا 34 که‌س زیادی کردوو.

به‌گوێره‌یی نووسراوه‌کانی ئه‌م رێکخراوه‌ ناده‌وڵه‌تییه‌، که‌ بنکه‌که‌ی له‌ شاری نیۆیۆرکی ئه‌مریکایه‌، وڵاتی ئێران به‌ 42ی رۆژنامه‌وانی به‌ندکراو، بۆ دووهه‌مین ساڵ له‌ پله‌ی یه‌که‌می جیهان دایه‌.

وڵاتانی ئێریتره‌، چین، برمه‌ و ڤیتنام هه‌ر کام به‌ 28، 27، 12 و 9 رۆژنامه‌وانی زیندانی، دوای ئێران گه‌وره‌ترین زیندانی رۆژنامه‌وانان له‌ جیهان دان.

به‌گوێره‌ی ئه‌م راپۆرته‌ 50% ئه‌و رۆژنامه‌وانانه‌ له‌ سه‌ر تۆڕی ئێنتێرنێت کاری رۆژنامه‌وانی ده‌که‌ن.