ک/میدیا: به‌پێی راپۆرتی چالاكانی ماف و دێموكراسی لە ئێران، سەر لە بەیانیی ئەمڕۆ سێ‌شەممە 12ی رەزبەری 1390ی هه‌تاوی، یەكێك لە به‌ندکراوانی سیاسیی كورد لە به‌ندیخانه‌ی ناوەندیی شاری كرمان بە نهێنی لە سێدارە درا.

به‌ندکراوی سیاسیی كورد "عەزیز خاك‌زادە" تەمەن 29 ساڵ و خەڵكی شاری سەڵماس ئەمڕۆ بە تاوانی "محاربە" و هاوكاری لەگەڵ حیزبه‌ دژبەرەكانی رێژیمی کۆماری ئیسلامیی ئێران لە سێدارە دراوە.

ئەو زیندانییە سیاسییە كوردە ساڵی 1386ی هه‌تاوی لەلایەن هێزە ئەمنیەتییەكانی رێژیمی ئێرانەوە دەستبەسەر و لە دادگای شاری خۆی حوكمی ئیعدامی بۆ بڕابووه‌وە.

به‌پێی هه‌مان سه‌رچاوه‌، به‌ هەوڵی بنەماڵە و پارێزەری عه‌زیز حوكمی ئیعدامی ناوبراو بۆ 5 ساڵ زیندانی كەم دەكرێتەوە و بۆ زیندانی كرمان دوور دەخرێتەوە.

چالاكانی ماف و دێموكراسی لە ئێران نووسیویانە، بەبێ‌ ئەوەی ئەو 5 ساڵ حوكمە لە دادگای فەرمیدا بگۆڕدرێ‌، دوێنێ‌ شەو لەناكاو عەزیز خاك‌زادە دەگوازرێتەوە بۆ ژووری تاكەكەسی و سەر لە بەیانیی ئەمڕۆ لە سێدارە دراوە و پاشان هەواڵەكەشی بە بنەماڵەكەی راگەیەنراوە.