ک/میدیا: سەر لەبەیانیی ئه‌مڕۆ (4/7/1390)ی هەتاوی، هەیئەتێكی پایەبەرزی حدکا بە سەرپەرەستیی بەڕێز مستەفا هیجری سكرتێری گشتیی حیزبی دێموكراتی كوردستانی ئێران و ژمارەیەک لە

ئەندامانی دەفتەری سیاسی و كۆمیتەی ناوەندی حیزب، سەردانی مەكتەبی سیاسیی پارتی دێموكراتی كوردستانیان كرد و لەلایەن هەیئەتێكی مەكتەبی سیاسیی پارتی بە سەرپەرستی بەڕێز فازڵ میرانی سكرتێری مەكتەبی سیاسیی پارتی دێموكراتی كوردستان پێشوازییان لێ‌ كرا.

لەم دانیشتنه‌ دۆستانەدا، سەرەتا فازل میرانی، خۆشحاڵیی خۆی له‌مه‌ڕ سەردانی هەیئەتی حیزب دەربڕی و لە باسێكی سیاسیدا تێڕوانین و بۆچوونی پارتی دێموكراتی كوردستانی سەبارەت بە پرسە سیاسییەكانی رۆژ و بارودۆخی ناوچە بە گشتیی و ئەو ئاڵوگۆڕانە كە بە بەهاری عەرەبی ناسراون دەربڕی و ئاستەنگ و كێشەكانی كورد لە قۆناغی ئێستادا و هەروەها وەزعی ناوچە سنووریەكان و گرژییەكانی ئەم دواییانەی بە وردی شی كردەوە و تەئكیدی لە سەر سیاسەتی نەتەوەیی پارتی كرد و دۆستایەتیی لەگەڵ هێزە سیاسییەكانی كوردستان كە قازانج ‌و بەرژەوەندیی كوردیان لا مەبەستە ‌و بیر لە سەقامگیربوونی دەسكەوتە سیاسییەكانی كورد دەكەنەوە بە گرینگ زانی ‌و لەو بارەوە بەڕێزەوە باسی لە واقیع‌بینی و سیاسەتی دروستی حیزبی دێموكراتی كوردستانی ئێرانی كرد و روانین ‌و هەڵویستەكانی حیزبی لە راستای جووڵانەوەی رزگاریخوازانەی كورد زانی‌.

پاشان كاك مستەفا هیجری باسێكی سیاسیی لەسەر رەوشی رۆژهەڵاتی ناوەڕاست ‌و ئەو قەیرانانەی رێژیمی كۆماری ئیسلامیی ئێران لە ئاستی نێونەتەوەیی، ناوچە ‌و نێوخۆیی وڵات لەگەڵی رووبەڕوووە كرد ‌و لەسەر رووداوەكانی دوو ساڵی نێوخۆیی رێژیم ‌و بزووتنەوەی رزگاریخوازیی گەلانی ئێران ‌و پرۆسەی دێموكراسی ‌و وەزعیەتی هێزەكانی ئوپۆزیسیونی ئێرانی ‌و كوردی كرد ‌و هەروەها لە بەشێكی دیكەی باسەكەیدا ئاماژەی بە سەفەری ئەمساڵی بۆ دەرەوەی وڵات ‌و ئاكامی دیدار ‌و چاوپێكەوتنەكانی لەگەڵ دۆستانی كورد ‌و بزووتنەوەی دێموكراسیخوازی ئێران كرد، هەر لەو باسەدا سیاسەتی شەڕخوازانەی رێژیمی كۆماری ئیسلامیی ئێران ‌و هێرشی بۆ سەر سنوورەكانی هەرێمی كوردستان‌ و ئاوارە كردن ‌و پەرتەوازە كردنی كۆمەڵانی خەڵک ‌و لەبین بردنی سەروەت‌ و سامانی گشتیی خەڵك لە هەرێمی كوردستان باس كرد، هەروەها لەو باسەدا درێژە پێدانی سیاسەتی حیزبی دێموكرات لە پێوەندی بە گەیشتنی پلاتفۆرمی هاوكاری لەگەڵ هێزە سیاسییەكانی ئێرانیی ‌بە زەروورەتێكی سیاسی زانی‌ و هەر لەو روانگەیشەوە یەكیەتی ‌و یەكڕیزیی هەموو لایەنە سیاسییەكانی كوردستانی بۆ پاراستنی دەسكەوتە سیاسی‌ و نەتەوەیییەكانی كوردی لە باشووری كوردستان بە ئەركێكی نەتەوەیی زانی.

لە كۆتاییدا بەڕێز فازل میرانی جارێكی دیكە سپاسی بەڕێز كاك مستەفا هیجری ‌و هەیئەتی هاوڕێی كرد بۆ ئەو سەردانە دۆستانەیان‌ و رایگەیاند پارتی سپاسی هەڵویستی نەتەوەیی حیزبی دێموكراتی كوردستانی ئێران دەكا‌و لەسەر دۆستایەتی ‌و پێوەندی سیاسیی هەر دوو لا پێی داگرتەوە.