ک/میدیا: كاتژمێر 9ی سەرلەبەیانیی رۆژی سێشەممە 22/6/90ی هەتاوی، لە ساڵونی فێرگەی سیاسی ـ نیزامیی حیزبی دێموكراتی كوردستانی ئێران، یەكەمین سمیناری
تەشكیلاتی یەكیەتیی لاوانی دیموكراتی كوردستانی ئێران، لە ژێر دروشمی "یەكیەتیی لاوان ناوەندێك بۆ دەرخستی تواناكان" بۆ بەرپرس و ئەندامانی كۆمیتەكان و كادرهكانی یەكیەتیی لاوان دەستی پێكرد.
سەرەتای سمینارەكە خولەكێك بێدەنگی بۆ رێزگرتن له گیانی پاكی شەهیدانی كوردو كوردستان و بە تایبەت شەهید لوقمان قازی كادری یەكیەتی لاوان راگەیەندرا.
پاشان فواد خاكیبەیگی سكرتێری گشتیی یەكیەتی لاوان لە لایەن كۆمیتەی بەرێوەبەری گشتی یەكیەتیی لاوانەوە بەخێرهاتنی بەڕێزان مستەفا هیجری سكرتێری گشتی حیزبی دیموكراتی كوردستانی ئێران و حەمەنەزیف قادری ئەندامی دەفتەری سیاسیی حیزبی دیموكراتی كوردستانی ئێران كرد كە ئامادەی سمینارەكە ببوون.
لە دانیشتنی یەكەمدا بەرێز كاك مستەفا هیجری باسێكی گشتی سەبارەت بە رۆڵی لاوان لە كۆمەڵگا و دەوریان لە بەرەوپێشبردنی شۆڕش و بزووتنەوەكان پێشكەش كرد و داوای كرد كە دەبێ لاوانی ئێران بەگشتی و لاوانی كورد بە تایبەت خۆیان لە نێو رێكخراوەكان و كۆڕ و كۆمەڵە سیاسیی و مەدەنییەكان رێك بخەن تاكوو بە هێزێكی یەكگرتوو و هیوایەكی پتر بەرەوڕووی دیكتاتۆری ببنەوە، لە كۆتایی ئەم بەشەدا ئامادەبوانی سمینارەكە چەند پرسیارێكیان لە بەرێز كاك مستەفا كرد كە لە لایەن بەرێزیانەوە بە وردی وڵام درانەوە.
لە دانیشتنی دووهەمی سمینارەكەدا بەرێز محەممەدنەزیف قادری وەك نوێنەری دەفتەری سیاسیی حیزبی دیموكراتی کوردستان بۆ پێوەندی لە نێوان حیزب و رێكخراوەكان، سەبارەت بە پێوەندی نێوان حیزبی دێموكرات و یەكیەتیی لاوان و هەروەها هاوكاری و پشتیوانی بەردەوامی حیزب بۆ رێكخراوەكان و لەسەر چەندین مەسەلەی دیكە كە لەلایەن ئامادەبوانەوە خرابوونە بەرباس شیكردنەوەی زیاتری پێشكەش كرد و لە زۆر بوارەوە سیاسەتەكانی حیزبی دیموكرات و دەوری لە بزوتنەوەی كورددا روون كردەوە.
لە درێژەی ئەم دانیشتنهدا ئەم باسانە هاتنە ئاراوە:
• باسێك لەسەر تەشكیلاتی لاوان لە دەرەوە، لە لایەن بەرێز هێدی رازین ئهندامی هەیئەتی ئیجرایی
• باسێك لەسەر تەشكیلاتی ئاشكرای یەكیەتی لاوان و شیكردنەوە فۆرم و ئائیننامەكان لە لایەن بەرێز جەلال رەوانگەرد ئەندامی كۆمیتەی بەرێوەبەریی گشتی
• باسێك لەسەر تەشكیلاتی نهێنیی یەكیەتیی لاوان لە لایەن بەرێز سۆران باریكه ئەندامی كۆمیتەی بەرێوەبەری گشتی
لە دانیشتنی سێهەمدا، نوێنەری كۆمیتەكانی یەكیەتیی لاوان بەرنامەی كاری خۆیان بۆ 6مانگی داهاتوو پێشكەش كردو بەشێكی لەلایەن نوێنەرانی كۆمسیۆنەكانی یەكیەتی لاوان وڵام درانەوە.
لە كۆتایی سمینارەكەدا فواد خاكیبەیگی سكرتێری گشتی یەكیەتی لاوان لە لایەن هەیئەتی ئیجرایی یەكیەتی لاوانەوە وڵامی تێکڕای رەخنە و پێشنیار و بەرنامەی كاریی كۆمیتەكانی دایەوە. كاتژمێر 5ی ئێوارەی 22/6/90 سمینار كۆتایی بە كارەكانی هێنا.
