مژاری وتووێژ: خولی نۆیەمی هەڵبژاردنی مەجلیسی رێژیمی ئێران
چوارچێوەی باس: رۆڵی خوێندکاران لە "تەحریمی چالاک"دا
نۆیەمین خولی هەڵبژاردنی مەجلیسی رێژیمی ئێران بەڕێوەیە و ئەم هەڵبژاردنە لەلایەن ئوپۆزیسیۆنی ئێران بە گشتی تەحریم کراوە. ئێوە، یەکیەتیی خوێندکارانی دێموکراتی کوردستانی ئێرانیش لەو تەحریمەدا بەشدارن.
ک/مــــــــــیدیا: هەوڵەکانی خوێندکاران لە چ بوارێکەوە دەتوانێ لە راستای تەحریمی هەڵبژادندا روڵ بگێڕێ و ئەو رۆلە چ باندۆرێکی دەبێت؟
ک. یووسفی: کاتێک باس لە تەحریمی چالاکی هەڵبژاردنەکان دەکەین، بێگومان دەور و ئەرکی هەموو توێژ و چینەکانی کۆمەڵگا دەتوانێت گرنگ و شوێندار بێت، خوێندکارانیش وەکوو بەشێک لە پێکهاتەی کۆمەڵگای ئێران بەگشتی و کوردستان بەتایبەتی دەتوانن دەوری تایبەتی خۆیان هەبێت. خوێندکار بە هۆی ئەو تایبەتمەندییەی کە هەیەتی واته بوونی لە زانکۆ و پێگەی کۆمەڵایەتی بۆ وەدەستهێنانی زانست و مەعریفە، ئەرکێکی قورستر دەکەوێتە سەرشانی، وەکوو توێژێک کە دەتوانێت رۆڵی پێشەنگایەتی بگێڕی و قووڵتر لە خەڵکی ئاسایی چاودێری بەسەر سیاسەتەکانی حکوومەتدا بکات و بەرگری لە مافەکانی خەڵک بکات. کۆماری ئیسلامی لە هەر قۆناغێکی زەمەنیدا بە خوڵقاندنی قەیران و زەق کردنەوەی دیاردەیەک هەوڵی داوە کە بەجۆرێک لە جۆرەکان و بە شێوەیەکی پۆپۆلیستی خەڵک بکێشێتە سەر سندووقەکانی دەنگدان و رەنگە بەشێک لە خەڵکی ئاسایی ئێمە فرێوی ئەم پیلانەنانەی رێژیمان خواردبێت، بەڵام خوێندکاران بە هۆی بەهرەمەند بوون لە زانست و خوێندنەوی ئەو بەری پیلانەکانی رێژیم دەبێ رۆڵێکی تایبەت لە باری ئاشکرا کردنی پیلانەکانی رێژیم بگێڕن و رۆڵی ئاگاکەرەوەیان هەبێت واته ناسان و ئاگایی بە خەڵک ببەخشن و سیاسەتە نگریسەکانی رێژیم بۆ خەڵک شرۆڤە بکەن ههتا بتوانن بڕیاری شیاو بدەن.
ک/مـــــــــیدیا: چ راسپاردەیەکتان بۆ خوێندکارانی نێوخۆی ئێران بەگشتی و کوردستان بەتایبەتی هەیە کە بتوانن لەژێر زەخت و گوشاری چەندقاتی رێژیمدا لەسەریان، رۆڵی کارای خۆیان لە چالاکتر کردنی تەحریمی هەڵبژارن بگێڕن؟
ک. یووسفی: ئەرکێک کە لەم بارودۆخە هەستیارەدا دەکەوێتە سەرشانی خوێندکارانی دەروەست گرنگتر لە هەر کات و ساتێکی دیکەیە، بۆ؟ چونکە هەنووکە کۆماری ئیسلامی لەگەڵ شەپۆلێکی قەیران بەرەوڕوویە، قەیرانی ناوخۆیی و جیابوونەوەی بەشێک لە پێکهاتەی دەسەڵات، ئابلۆقە نێونەتەوەییەکان، دوور بوونەوەی بەشێک لە گرووپەکانی بەستراوە بە کۆماری ئیسلامی لە ناوچەدا لەم رێژیمە، نەمانی کارتێکەری ناوچەیی و هەروەها ئەگەری هێرشی سەربازی بۆسەر رێژیم و داڕمانی پێکهاتەی ئابووریی وڵات، وایکردووە کە رێژیم لە هەر کات و ساتێکی دیکە زۆرتر لە ژێر گوشاردا بێت، هەر بۆیە خوێندکاران دەتوانن بە روون کردنەوەی سیاسەتەکانی رێژیم و ئامانجەکانی بۆ راکشانی خەڵک بۆسەر سندووقەکانی دەنگدان، خەڵکی ئاسایی و نائاگا لە چوون بۆ سەر سندووقەکان ئاگادار بکەنەوە کە رۆیشتنی ئەوان بۆ سەر سندووقەکانی دەنگدان تەنیا قازانجێک کە دەتوانێت هەیبێت رەوایی دان بە رێژیمە و هەر بۆیەش ئەوان دەبێت لە نەبوونی حیزبە سیاسییەکان و راگەیاندنە سەربەخۆ و دژبەرەکاندا ئەرکی هۆشیار و ئاگاکردنەوەی خەڵک لە ئەستۆ بگرن.
ک/مــــــــــیدیا: ئێوە وەکوو یەکیەتیی خوێندکارانی دێموکراتی کوردستانی ئێران، ههتا چەندە هەوڵتان داوە کە ئەم تەحریمە چالاکتر بکەن و هەوڵەکانتان لە چ چوارچێوەیەکدا خۆی دەنوێنێت؟
ک. یووسفی: بە هۆی ئەو زەخت و گوشارە و فەزای هەڕەشە و تۆقانەی کە بەسەر ئێراندا زاڵە، راستە رێگە نادرێت کە بە شێوەیەکی ئازاد چالاکی بکرێت و هەر بۆیەش ئێمەش یەک لەو رێکخراوانەیان بە مۆڵەتی یاسایی چالاکیمان لە نێو خۆ نیە، بەڵام ئێمە لە رێگەی ئەندامان و راگەیەنە گشتیەکانەوە هەوڵمان داوە و هەوڵیش دەدەین کە بتوانین خەڵک ئاگادار بکەینەوە و پانتایی تەحریمەکان بەربڵاوتر بکەینەوە. هەر لەم پێوەندییەشدا لە رێگەی گرتنی سیمناری زانستی و بە بەشداری کەسانی شارەزا و بڵاوکردنەوەی لە رێگەی کاناڵە ئاسمانییەکانەوە ویستوومان دهوری خۆمان لەم بوارەدا هەبێت. هەوڵەکانی ئێمەش بێگومان ههتا کاتی بەڕێوەچوونی ئەو هەڵبژاردنەوە و دواتریش هەر بەردەوام دەبێت و هیوادارین کە خوێندکاران لەم بوارەدا بتوانن رۆڵێکی ئەکتیڤیان هەبێت و بە ئاگا کردنەوە و رێکخستی خەڵک رادەی بەشداری لە هەڵبژاردنەکاندا کەمتر بکەنەوە و رێژیم بەرەوڕووی قەیرانی رەوایی بکەنەوه.
