بەناوی خوای گەورە و میهرەبانهاونیشتمانانی بەڕێز
خەڵکی موسڵمان و تێکۆشەری کوردستان
یەکیەتیی زانایانی ئایینیی کوردستانی ئێران "12ی ربیع الاول"، یادی لە دایک بوونی حەزرەتی محهممهد (دروودی خوای لێ بێت) لە هەموو موسڵمانان بەگشتی و خەڵکی موسڵمان و تێکۆشەری کوردستان پیرۆز دەکات و لە خوای گەورە و دڵۆڤان داواکارە هزر و ئەندێشەکانی
کە لە رێگای پێغەمبەری گەورەمان حەزرەتی محهممهد کە پایە و بنیاتی ژیانێکی ئاسوودە و بەختەورەوە کە قورئانی پیرۆزە گەیشتۆتە دەستی موسڵمانان، ببێتە هەوێنی ئاشتی و تەناهی بۆ هەموان.
لە نێو مێژوودا زۆر رووداوی گرینگ هەن کە بۆ هەتاهەتایە لە یاد و بیرەوەریی هەموو لایەکدا دەمێنێتەوە، کاریگەرترین رووداوی مێژوویی کە توانیویەتی وەک ئەستێرەیەکی پرشنگدار لە ئاسمانی بایەخە مرۆڤایەتییەکاندا بمێنێتەوە، لەدایک بوونی فەخری عالەم حەزرەتی محهممهدی مستەفایە کە زیاتر لە 1400 ساڵە شەیدایانی بیر و هەستی پاک و خواناسی عەوداڵی شوێن پێی و رێگا و رێبازەکەین.
یەکیەتیی زانایانی ئایینیی کوردستان وەک یەکیەتییەکی دەروەست لە یادی لەدایک بوونی ئەو مرۆڤە پایە بەرز و بلیمەتەدا لە خوای مەزن داواکارە سەرجەم خەڵکی چەوساوە و مەزڵوومی جیهان لەژێر چنگی ئەو دیکتاتۆرانە رزگار بکات کە بە ناوی ئایین و ئیسلام و فەرموودەکانی پێغەمبەری گەورەمانەوە، لە هیچ چەشنە زوڵم و زۆرێک دەست ناپارێزن.
بەرز و پیرۆز بێت یادی لەدایک بوونی حەزرەتی محهممهد (دخ)
یەکیەتیی زانایانی ئایینیی کوردستانی ئێران
15/11/90
